Breaking News

নাছ


বাংলা প্যারিস ওয়ার্ল্ড_ ০৪/১২/২০১৯

নাছ
ফায়সাল আইয়ূব

তনাইর বলে ফাঠায় নাছে, বাটায় নাছে ফান
ছফরি গাছো কটায় নাছে, ঢোলে নাছে গান।

ছন্নিরাইতো তেরায় নাছে, কুছায় নাছে হউল
ফুয়ার গেছে হক্কল ফুড়ির ভালা লাগে ডৌল।

বাউল বেটার চুলে নাছে, মশায় নাছে হাইঞ্জায়
মাইঞ্জা মারা গুড্ডি নাছে, মজা মিলে আইঞ্জায়।

হাছা মাতে বউতে নাছে, যেলা নাছায় ছুতরায়
ফুড়ির লগে মাতবার লাগি সুযোগ থুকায় ফুতরায়।

বইদা নাছে তাওয়ার মাঝে মামলেট কইয়া খায়
মুরগা ডেমি রেস্টুরেন্টো চিকিন বনি যায়।

মাজার পূজায় ভণ্ডা নাছে, খলকি নাছে ধূমায়
ভাবুক নাছে রাইতবিরাইতে, সূর্য উঠলে ঘুমায়।

আড্ডাবাজে বাজার নাছে, গামছা নাছে কান্ধো
গাঁওগেরামোর কতো মানুষ শিক্ষাদীক্ষায় চান্দো।

জঙ্গীবাজে দুনিয়া নাছে, লঙ্গীবাজে কওমী
সবুরালীর ফুড়ির নাম যে সিসিলিয়া নওমী!

ফেটর ভিতরে ইল্লত নাছে, হুটকির গন্ধে উন্দুর
ভাজা মাছর গন্ধে বিলাই করে দুন্দুরবুন্দুর।

খাইঞ্জা হিছার বাদে নাছে কই মাগুরে বেশি
জাতর বড়াই বউতে করে, করতে গেলে খেশি।

বাফর বলে বেটায় নাছে, মায়ের গুণে বেটি
চিতল মাছর কোপ্তা আনো, গোয়াল মাছর ফেটি।

রাইত অইলে গিরস্ত ঘুমায়, চোর নাছে তার ধান্দায়
ধার-করজোর লগে লগে দেশটা চলে চান্দায়।

বাদে-ভালায় মানুষ নাছে, যেলা কালা-ধলা
কিড়মিড়ি খায় আঙ্গাজ আলী, বেআঙ্গাজর গলা।

ফটিক থাকি টঙ্গিঘরো যাইতে নাছে ছাত্তি
ইলেকশনো চেয়ারমেনর মার্কা আছিল আত্তি।

গরুর গুজো পাখি নাছে খাইতো করি ফুক
হকলোর মনো বান্ধে বাসা হুরু বড়ো দুখ।

ধান মাড়াইতে ফাইজন নাছে, মেউয়া ঘুরে মাঝে
হক্কল বাড়িত তেড়া থাকে ফাতাইর অইবার কাজে।

বউ মরলে জামাই নাছে হেঙ্গা করার ইচ্ছায়
হেঙ্গা অইলে বেঙ্গা বাড়ে হাইর ফরিবার ফিচ্ছায়।

তুফান আইলে গাছে নাছে, হকলে জফোইন আল্লা
আন্নায় সবে হারা বছর মারতে থাকোইন ফাল্লা।

ডাইলোর মজা নাছে মুরো, ঘুষর মজা ফাইলো
কেউরোর গতর মাইলে চলে, কেউ মজা ফায় গাইলো।

ফালোর মাঝে ছিংলা নাছে, খালোর মাঝে আঁস
গালোর তিলে দিগরা লাগে, দড়ি ছাড়া ফাঁস।

বাদুয়া সময় দুঃখ নাছে, বন্ধু নাছে সুখে
ভালোবাসায় মানুষ নাছে, মায়া বুকে মুখে।

বাইচ্চা নাছে মায়ের ফেটো, ছাইচ্চা ইমানদারে
কালা ধলার ধার ধারে না ভালা লাগে যারে।

জুয়ান থাকি বুড়া বেশি রাইতকু নাছোইন চ্যাটো
ফোন খুললেউ দেখবায় তারা হজাগ আছোইন নেটো।

রূফর লগে বড়াই নাছে, সম্মান থাকে গুণে
ফানর মজা খয়ের ছুনে, ছালম মজা নুনে।

বউর লগে হড়ি নাছে, জামাইর লগে বউ
খাইতে মজা বয়সে ফুরা বড়ো ফুরকির রউ।

হুরু থাকতে মনে নাছে কুন্দিন বড়ো অইতাম
কামোর কথা হুরুতাইনরে কুদাম মারি কইতাম।

ভালোবাসাত মায়া নাছে, মায়া আসায়-কান্দায়
চউকে দেখা কীজাত খুশি জিকাও কোনো আন্ধায়!

বান্নি থাকি লইয়া আনা ফরফরিয়ে নাছে
লাখো নাছর লগে লগে মাইনষর জীবন বাঁছে।

About banglaparisworld

Leave a Reply

Your email address will not be published. Required fields are marked *